सिक्रेट सुपरस्टार

आपण आपल्या आयुष्यातील अमूल्य माहिती गुगल, फेसबुकला फुकट देत असतो. हीच माहिती ते करोडो रुपयांना विकून त्यांचा धंदा जोरात चालवायला लागले आहेत. किमानपक्षी या दोन संस्थांना थोडीतरी नितीमत्ता आहे, ज्यामुळे त्यांनी आम्ही माहिती चोरली आणि ती विकली हे कबूल तरी करतातय. आपल्या देशात अशा अनेक कंपन्या असतील ज्या वेगवेगळ्या मार्गाने इंटरनेटवरून माहिती जमा करत असतील आणि ज्यांचा कोणाला पत्ताही लागणार नाही. पत्ता लागला तरी त्या कंपन्या कबूल करतील याचा नेम नाही. अशा सगळ्या धटींगणांना पुरून उरणारी डार्क वेब ही संकल्पना उदयास आली.

डार्क वेब हे अंडरवर्ल्ड सारखं आहे, ज्याचा उपयोग चांगल्या कामासाठी कमी आणि वाईट कामांसाठी जास्त उपयोग होतो. रॅनसमवेअर तयार करणारे, खंडणी मागणारे, हेरगिरी करणारे, हॅकींग करणारे हे सगळे डार्क वेबचे सदस्य आहेत. कोणताही चोर असो मग तो पाकिटमार असो, दरोडेखोर असो किंवा इंटरनेटवरून खंडणी मागणारा प्रत्येकाच्या मनात पोलिसांबद्दल भीती असतेच. ही भीती इंटरनेटवर वाईट धंदे करणाऱ्यांच्याही मनात असते.   इंटरनेटवरून संशयास्पद हालचाल दिसली की त्याला पकडण्याचा सोपा मार्ग असतो तो म्हणजे त्याचा आयपी अॅड्रेस शोधून काढणं. फ्रॉड मेल, धमकी देणारे मेल, किडनॅपिंग, फिशिंग, पोर्नोग्राफी असे सायबर गुन्हे आणि गुन्हेगार शोधण्यासाठी वापरात आलेल्या संगणक किंवा मेलवरून गुन्हेगाराचा आयपी अॅड्रेस (इंटरनेट प्रोटोकॉल अॅड्रेस) शोधला जातो. असा मेल कोणत्या सर्व्हरवरून आला, हे शोधले जाते. आयपी अॅड्रेसवरून वापरण्यात आलेला संगणक, त्याचा प्रकार, इंटरनेट स्पीड, सर्व्हरचे लोकेशन शोधून काढत गुन्हेगाराला शोधता येते. त्यामुळे आपला आयपी अॅड्रेस कोणाला कळू नयेत यासाठी डार्क वेबमंडळी विविध युक्त्या शोधून काढत असतात. टॉर ब्राऊझर ही त्यातलीच एक युक्ती आहे. 

 

TOR चा फुलफॉर्म आहे The Onion Router. याचं नाव थोडं मजेशीर आहे कारण त्याच्या मागचा अर्थ Onion म्हणजेच कांद्याशी जोडला गेलेला आहे. या ब्राऊझरमधून आपण सर्फींग केल्यास आयपी अॅड्रेसवर कांदयाची आवरणं असतात, तशी आवरणं तयार केली जातात ज्यामुळे तुमचा पत्ता कळूच शकत नाही. मीजेव्हा हा ब्राऊझर वापरून काम करायला सुरुवात केली तेव्हा माझा आयपी हा पॅरीस, बेल्जियम सारख्या देशातील असल्याचं दाखवत होतं.

टॉर सारख्या ब्राऊझरचा आम्हाला काय उपयोग, आमच्याकडे का आहे लपवण्यासारखं असा प्रश्न हमखास विचारला जातो. विषय तुमच्याकडे लपवण्यासारखं काय आहे हा नसून तुमच्या नकळत माहिती चोरली जातेय याचा आहे. तुम्ही काय करता, कुठे फिरता, कोणाबरोबर फिरता, खायला का आवडतं, पॉर्न बघता का? कोणत्या वेबसाईट जास्त पाहता, मेलचे पासवर्ड काय आहेत अशा असंख्य गोष्टी माहिती स्वरुपात जमवून तुम्हाला ब्लॅकमेल करता येऊ शकतं, तुम्हाला त्रास देता येऊ शकतो. नेटबँकींगसाठी तर टॉरसारखा ब्राऊझर वापरणं अत्यंत गरजेचं आहे. आपल्यापैकी अनेकजण लपून छपून टोरेन्टद्वारे पिक्चर डाऊनलोड करत असतो. यासाठी टॉर हा अधिक फायदेशीर ठरू शकतो. टॉर ब्राऊझर डेस्कटॉप किंवा लॅपटॉपवर जितका प्रभावीपणे वापरता येतो तितका मोबाईलवर प्रभावीपणे वापरता येत नाही. सध्या हा ब्राऊझर फक्त अँड्राईडसाठी उपलब्ध करून देण्यात आला आहे. आयफोन वापरणाऱ्यांना हा ब्राऊझर वापरासाठी उपलब्ध करून देण्यात आलेला नाहीये.