मी कोकणातला असल्याने बोटीने कोकणात जाणाऱ्यांचे हाल ऐकून होतो. माझे आजोबा आणि त्यांचा मोठा भाऊ बोटीने कोकणात गेलेही आहेत आणि मुंबईलाही आलेत. बराच मोठा प्रवास , कडक ऊन , खचाखच गर्दी या सगळ्या दिव्यातून प्रवास करत ते कोकणात जायचे. कोकण सेवक आणि कोकण शक्ती या दोन बोटींनी हा प्रवास व्हायचा , मात्र त्या बंद पडल्याने आपल्याला बोटीने कधी कोकणात जाता आलं नाही , याची खंत सतत मनात होती. हे दु:ख पूर्णपणे नाही पण काही अंशी दूर करता आलं ते आंग्रिया या नव्याने सुरू झालेल्या क्रूझ सेवेमुळे. सुख यासाठी आहे कारण कोकणातील समुद्रसंपदा जवळून पाहण्याची संधी या क्रूझमुळे मिळणार आहे , दु:ख यासाठी आहे कारण ही क्रूझ रत्नागिरी , सिंधुदुर्ग , मालवण , वेंगुर्ले अशी कुठेही न थांबता थेट गोव्यात जाणार आहे. बस , ट्रेन , विमान या तिन्ही मार्गांनी प्रवास केलेल्या माझ्यासारख्या माणसाला बोटीने लांबचा प्रवास करणं हे स्वप्न होतं. बातम्यांसाठी मी कोणतीही सुरक्षा नसलेल्या मासेमारांच्या बोटीतून प्रवास केला आहे , मात्र मोठ्या बोटीतून प्रवास करता आला नव्हता. त्यामुळे आंग्रिया क्रूझ केव्हा सुरू होतेय याव...